Diwali ki subah poore Delhi-NCR ko dhund ki ghani chadar ne dhank liya hai. Dar-ul-hukumat ke kayi hisson mein hawa ke meyar ki kaifiyat (air quality) 'intehai kharab' zamray mein bani hui hai. Ziyada tar jaghon par air quality index (AQI) 400 ke qareeb darj kiya gaya.

Central Pollution Control Board (CPCB) ke mutabiq, India Gate ke aas paas AQI 398 raha, jabke Akshardham Mandir ke aas paas 336 darj kiya gaya. Wohin, Anand Vihar mein yeh 328 raha. Tamam aadaad-o-shumar 'intehai kharab' zamray mein aate hain.

10 saal ka record toota:

Diwali ki peshgi shaam yani 7 November ki shaam AQI 369 darj kiya gaya, jo 'bohat kharab' zamray mein aata hai. Is se pehle 2016 mein AQI 404 darj kiya gaya tha. Wohin, guzashta 24 ghanton ka ausatan AQI 1 November ko 261 tha, jo ab barh kar 369 ho gaya hai.

Hafte ki subah Delhi ke 59 monitoring stations par PM2.5 ki ausat satah 295 microgram per cubic meter darj ki gayi. 36 stations par yeh satah 250 se oopar thi.

Hafte ki raat 8 baje pataakhe jalane ke liye tay-shuda waqt shuru hone ke 2 ghante ke andar hi Delhi ki hawa pichhli raat ke muqable mein 30 percent ziyada aaloodah ho gayi.

Hindustan Times ne CPCB ke aadaad-o-shumar ke hawale se bataya ke 55 stations par PM2.5 ki satah shaam 7:45 baje 177 microgram per cubic meter thi, jo raat 8 baje barh kar 208 aur raat 10 baje tak 289 tak pahunch gayi.

Delhi mein pehle se kayi pabandiyan nafiz:

Khayal rahe ke Delhi hukumat ne 1 November se kayi pabandiyan nafiz kar di hain. In mein beghair PUC wali gaadiyon ko eendhan na dena, Delhi ke bahar registered ghair BS-VI gaadiyon ko dar-ul-hukumat mein dakhil hone se rokna, diesel buson ke dakhlay par pabandi jaise iqdataam shamil hain.